त्यहाँको सौन्दर्यले भण्डारी लोभिएका छन्। भुस्वामित्वको कागज पाउने बित्तिकै निर्माण प्रक्रिया अघि बढाउने आश्वासन उनले दोलखावासीलाई दिइसकेका छन्। स्थानीय आगुवाले करिब ६ सय रोपनीमा स्टुडियो खडा गर्ने सपना देख्दै नाम समेत जुराइसके, 'डलिउड'।
आठ महिनाअघि मात्रै उनले 'फिल्म नगरी'को सपना बाँडेका थिए कास्कीको धिताल गाउँमा। त्यहाँबाट देखिने हिमशृंखला र भूबनोटलाई आधार मान्दै उनले भनेका थिए, 'यो ठाउँलाई देशको केन्द्रिय स्टुडियो बनाउँछौं। त्यसो गरे विदेशी समेत यहाँ सुटिङ गर्न आउँछन्।' उनको आश्वासनसँगै त्यहाँ जग्गाको भाउ मात्र बढेन, कतिले जग्गामा परेको रुखै काट्न थाले। स्टुडियो के हो भन्ने नबुझे पनि गाउँमा विकासको मूल फुट्ने ठानेर त्यहाँका बासिन्दाले फूलमालाले भण्डारीको गला भरे।
'मंसिरको अन्तिम साता पनि अवलोकन गर्न बोर्डका प्राविधिकहरु आएका थिए। पोखराबाट अन्य प्राविधिक पनि झिकाउने भन्दै हामीलाई थप व्यवस्था मिलाउन अनुरोध गरे, तर फर्किएनन्,' उनले गुनासो गरे।
सरकार परिवर्तन हुनसक्ने भन्दै बोर्डका पदाधिकारीले जतिसक्दो छिटो काम सक्न अनुरोध गरेकाले थप आशा जागेकोे अधिकारीको भनाइ छ। मंसिर अन्तिम साता स्टुडियो निर्माण समितिका तत्कालिन संयोजक तथा बोर्ड सदस्य उदय सुब्बाको नेतृत्वमा प्राविधिक सहितको टोली जयकोट र उपल्लो अस्ताम क्षेत्रको अवलोकनमा पनि पुगेको थियो।
'अहिलेसम्म चारपटक गाउँ आएका बोर्ड पदाधिकारीले हामीलाई धितालमै स्टुडियो बनाउने वचन दिए,' स्थानीय स्तरमा गठित स्टुडियो निर्माण समितिका संयोजक श्याम दाहालले नागरिकसँग भने, 'हाम्रो गाउँमा ल्याउने योजना नै थिएन भने आश्वासन दिनु हुँदैनथ्यो।' उनले बोर्डको पछिल्लो गतिविधि गैरजिम्मेवारीपूर्ण रहेको टिप्पणी गरे। आफूले स्टुडियोको विषयमा अध्यक्षको धारणा जान्न खोज्दा राजधानीबाहिर काममा व्यस्त रहेको भन्दै स्पष्ट जवाफ नदिएको उनको कथन छ।
धिताल गाउँमा स्टुडियो बनाउन जोड दिने फिल्मकर्मी शिवजी लामिछाने जग्गा भोगचलनको अधिकार बोर्डलाई नदिएसम्म समस्या पर्ने बताउँछन्। बोर्ड टोलीसँगै सो क्षेत्रको अवलोकनमा पुगेका लामिछानेले भने, 'त्यहाँ स्टुडियो बनाउने कुरा रेडबुकमै उल्लेख भइसकेको छ। देशको फिल्मनगरी पोखरामै बन्नु पर्छ र बन्छ पनि।' तत्काल काम अघि नबढे पनि निराश नहुन उनले धितालबासीलाई अनुरोध गरे।
त्यसो त स्थापनाकालदेखि नै बोर्डले स्टुडियो निर्माणको नारा चर्काउँदै आएको छ। टोखा, नाङ्लेभारे, नागार्जुन जस्ता उपत्यका आसपासका ठाउँलाई अघिल्ला अध्यक्षहरुले स्टुडियो निर्माण स्थलको रूपमा प्रस्ताव गरेका थिए। वर्तमान अध्यक्ष भण्डारीले धिताल गाउँ, कोहलपुर र दोलखा पुगेर स्टुडियो बनाउने योजना बाँडे। तर गृहकार्यबिनाको आश्वासनका कारण उनले आलोचनाको समना गर्नु परेको छ।
फिल्म निर्देशक नवीन सुब्बा बोर्ड पदाधिकारीले जता गए पनि स्टुडियो बनाइने वचन दिँदा आन्योल सिर्जना भएको बताउँछन्। फिल्मनगरी बनाउने घोषणा गर्नु अघि पूर्वाधारबारे प्रष्ट हुन उनी आग्रह गर्छन्। नेपालमा 'इन्डोर स्टुडियो'को खाँचो औँल्याउँदै उनले भने, 'कैलालीको थारु गाउँ होस् या कास्कीको घान्द्रुक। ती आफैं प्रकृतिक स्टुडियो हुन् र त्यहाँ विषयको माग अनुसार सुटिङ भएकै छ। जहाँ सुटिङ गर्न असम्भव छ त्यसको सेट लगाउन सकिने स्टुडियो चाहिएको हो।' उनले स्टुडियो बनाउने ठाउँमा फिल्मकर्मीलाई आवश्यक पर्ने सबै सुविधा उपलब्ध गराउनु पर्ने धारणा राखे। 'प्रकृतिले नै दिएको ठाउँमा जाऊ भन्नु पर्दैन। पूर्वाधारबिना जहाँ घोषणा गरे पनि सुटिङ गर्न जाँदैनन्,' स्टुडियोबारे 'क्लियर' हुन आग्रह गरे उनले।
फिल्म र म्युजिक भिडियो बनाउँदा 'भर्चुअल सेट'मा खेल्न खप्पिस सिमोस सुनुवार स्टुडियो नहुँदा धेरै दुःख खेप्नु परेको सुनाउँछन्। सुटिङ गर्न छिरेपछि ६० प्रतिशत काम सकेर निस्कन पाउने स्टुडियोको आवश्यकता देख्छन् उनी। बोर्डले सुनाउँदै हिँडेको स्टुडियो अवधारणासँग उनी सहमत छैनन्।
- नागरिक न्यूज
0 प्रतिकृया/हरु:
Post a Comment
कमेन्ट गर्दा कृपया सभ्य भाषा मात्र प्रयोग गर्नुहोला ।