हल्लाले हैरान बिराज

शनिबार काठमाण्डूमात्र के टेकेका थिए, हिरो बिराज भट्ट लगातार आइरहने फोनकलहरुले हैरान बने । उनको खुट्टा भाँचिएको हल्ला शनिबार र आइतबार नेपाली सिनेजगतमा आगोजस्तै फैलियो ।

मोबाइलमा हल्लाको खण्डन गर्ने काम सोमबार पनि सकिएको छैन । खण्डन गर्दागर्दै बिराज हत्तु भैसकेका छन् । यतिसम्मकी नगरकोटमा सुटिङ सुरु भएको चलचित्र 'मृगतृष्णा'मा ब्यस्त बिराज हल्लाकै कारण थकित भएको कुरा उनका निकटवर्तीहरुले बताउन थालेका छन् ।

बिराजका पारिवारिक सहयोगी तथा अभिनेता पुष्कर भट्टका अनुसार सुटिङमा खुट्टा भाँचियो भन्ने खबर हल्ला मात्र हो बिराजलाई केही भएको छैन । बिराजमात्र होइन पुष्कर स्वयम पनि हल्लाको खण्डन गर्न ब्यस्त छन् । 'सबैले बिराजजीको खुट्टा भाँचिएको हो भनेर कलबाट सोध्छन्' पुष्करले भने 'खण्डन गर्ने कामले व्यस्त भइएको छ ।' मेरोसिनेमाको जिज्ञासामा पनि विराजले हल्लालाई 'अनर्गल' भएको टिप्पणी गरे ।

दुइमहिनापछि बिराज मुम्बइबाट काठमाण्डू फर्किएका हुन् । तुलसी घिमिरे निर्देशित 'मृगतृष्णा'मा व्यस्त बिराज अवरुद्ध 'जय होस' चलचित्रको सुटिङमा पनि लाग्नेछन् । भर्खरै भोजपुरी चलचित्र 'दुस्मनी' सकेर आएका उनी 'मृगतृष्णा' सकिएपछि मुम्बइ फर्किएर पुनः भोजपुरी फिल्ममा लाग्नेछन् । Source: MeroCinema