दुई पत्नीको चेपुवामा निखिल

कास्की, फाल्गुन २७ - विवाहित अभिनेता निखिल उप्रेती अभिनेत्री सञ्चिता लुइँटेललाई पनि अपनाएपछि चेपुवामा परेका छन् । न उनी धुमधामसँग विवाह गरेर भित्र्याएकी पत्नी कोपिलालाई छाड्न सक्छन् न त पछिल्ली सञ्चितालाई । सञ्चिताले निखिललाई जेठी पत्नी कोपिलालाई छाड्नुपर्ने दबाब दिएपछि केही दिनयता निखिल तनाबमा परेका हुन् ।

निखिल कोपिला र सञ्चिता दुवैलाई त्याग्न नसक्ने बताउँछन् । 'म एउटालाई छाडेर अर्कोलाई लिएर अघि बढ्न सक्दिनँ,' निखिलले भने । साथीबाट प्रेमिका हुँदै एकअर्कोलाई स्वीकारेका सञ्चिता र निखिल करिब नौ महिना मुम्बईमा सँगै बसेका थिए । अहिले भने उनीहरू सँगै छैनन् । सञ्चिता माइतीमा बस्दै आएकी छन् भने निखिल अहिले सुटिङका क्रममा पोखरामा छन् । कतिपयले त निखिलले कोपिलालाई छाडेर सञ्चितासँग बस्न थालेको अड्कलबाजी पनि गरेका थिए । तर हालै मुम्बईबाट नेपाल आउने क्रममा निखिलले पत्नी कोपिला र डेढ वर्ष छोरासँग तस्बिर खिचेपछि अड्कलबाजी गलत सावित भएको छ । नेपाल आएपछि सुटिङबाहेकको अधिकांश समय उनी पत्नी कोपिलासँग भक्तपुरस्थित घरैमा बस्ने गरेका छन् ।

पोखरामा सुटिङका क्रममा पनि मोबाइलमा कोपिला र उनको दैनिकजसो कुराकानी हुने गरेको छ । यही कुराकानी सञ्चितालाई मन परिरहेको छैन । स्रोतका अनुसार सञ्चिताले निखिललाई कोपिलासँग भेटघाट मात्र नभई बोल्नसमेत निषेध गर्न खोजेकी छन् । सञ्चिताले कोपिलासँगको सम्बन्ध पूरै 'कट' गर्न भने पनि कोपिला भने यसबारेमा केही बोलेकी छैनन् ।

कोपिलासँग टेलिफोनमा सम्पर्क गर्दा 'आफूले अहिले केही नबोल्ने' बताइन् । सञ्चितासँग सम्पर्क गर्न खोज्दा उनी पनि उपलब्ध भइनन् । यसअघि सञ्चिताले निखिलको सम्पत्ति सबै कोपिलाले आफ्नो नाममा पारेको भन्दै विरोध गरेकी थिइन् । तर, निखिलले पत्नीको हैसियतले घरसहितको करिब २ करोडको सम्पत्ति कोपिलाको नाममा रहनु स्वाभाविक भएको बताए । 'कोपिलाले जबरजस्ती गरेर घरसम्पत्ति आफ्नो बनाएकी हैनन्,' निखिलले कान्तिपुरसँग भने । साभार: इकान्तिपुर