महजोडीको युटर्न !

आफूलाई सँधै जनहित, सन्देशमूलक विज्ञापन र सानो पर्दामा प्रस्तुत गर्दै आएको लोकप्रिय महजोडी अब भने व्यावसायिक विज्ञापनमा पनि देखापर्न थालेको छ । मदनकृष्ण श्रेष्ठ र हरिवंश आचार्य पहिलोपटक कमर्सियल एड्भर्टाइजमा प्रस्तुत भएका हुन् ।

सामाजिक र राष्ट्रिय मुद्दामा अभिनय गरेर ख्याति कमाएको यो जोडी पछिल्लोपटक डिस नेपाल र वेस्टर्न युनियन मनि ट्रान्सफरजस्ता बहुराष्ट्रिय कम्पनीका विज्ञापनमा खेलेको छ । नेपाल लाइफ इन्स्योरेन्स कम्पनीले त महलाई आफ्नो ब्रान्ड एम्बेसडर समेत घोषणा गरिसकेको छ । महजोडीका एक सदस्य हरिवंशले कमर्सियल विज्ञापन खेल्दा आफूहरुलाई कुनै असहज नभएको र दर्शकहरुले माया गरिरहने बताए ।

मदनकृष्ण पहिलोपटक व्यवसायिक प्रकृतिका विज्ञापनमा देखापरेका हुन् । हरिवंश भने दसवर्षअघि सीताराम दूधको एक विज्ञापनमा खेलिसकेका थिए । 'कमर्सियल विज्ञापनमा खेल्नुको अर्थ हामीले जनहितकारी विज्ञापनलाई चटक्कै छाड्छौं भन्ने चाहिँ होइन' हरिवंश भन्छन् 'दुवैबाट राम्रो रेस्पोन्स आएकाले दुवैलाई सँगै अघि बढाउँछौं ।' डिस नेपालको विज्ञापनमा महजोडीको अभिनय यतिबेला हिट बनेको छ ।

आफ्नो अभिनयमार्फत झगडिया नेताहरु, प्रेस स्वतन्त्रताको वकालत गर्ने पत्रकारहरु र जेब्रा क्रसिङको ब्याख्या गर्ने ट्राफिकहरुलाई मिलाउने महजोडीले अब ब्यावसायिक विज्ञापनमार्फत कस्तो प्रभाव पार्ने हुन् पर्खनुपर्ने अवस्था छ । Source: MeroCinema