सुशीलको 'डेब्यु'

चर्चा-परिचर्चाभन्दा टाढा छन् नायक सुशील क्षेत्री । एक दशकअघि चलचित्र 'आगो' का काम गरेर सञ्चार क्षेत्रमा छाउँदा पनि उनी आफ्नो चर्चा आफैं गर्दैनथे । अन्तर्मुखी स्वभावका यी नायकलाई केही म्युजिक भिडियोमा अभिनय गर्ने अफर पनि नआएको होइन । लोक, आधुनिक, रिमिक्स सबै खाले म्युजिक भिडियोबाट उनलाई अफर आयो, तर यी अन्तर्मुखी नायकलाई एउटा भ्रम थियो कि म्युजिक भिडियो खेलियो भने दर्शकले राम्रो मान्दैनन् । त्यतिबेला आएका सबै प्रस्तावलाई उनले सोझै अस्वीकार गरिदिए । अहिले समयले कोल्टो फेरेको छ, राजेश हमाल, दिलीप रायमाझी र आर्यन सिग्देल आदिले बेलाबखत म्युजिक भिडियोमा अनुहार देखाउन थालेपछि सुशीललाई पनि जंग चलेछ । अबचाहिँ सुशीललाई रहर जागेछ । पहिलो अफर गरे लन्डन बसोबास गरिरहेका मिलन चाङले । राजेशपायलले गाएको एउटा अनि अर्को एउटा म्युजिक भिडियोमा भर्खरै सुशीलले अभिनय गरे । जोमसोममा छायांकन गरिएका ती दुवै म्युजिक भिडियोमा सुशीलको जोडी हेमा श्रेष्ठ छिन् । म्युजिक भिडियोको संसारमा ढिलै भए पनि सुशीलको 'डेब्यु' भएको छ । From: Saptahik